ກົມການຄ້າພາຍໃນ

     ກົມການຄ້າພາຍໃນແມ່ນກົງຈັກໜຶ່ງຂອງກະຊວງອຸດສາຫະກໍາ ແລະ ການຄ້າ ມີພາລະບົດບາດເປັນເສນາທິການໃຫ້ກະຊວງ ໃນການຄຸ້ມຄອງ ແລະ ພັດທະນາຕາໜ່າງການຄ້າ, ສະມາຄົມອຸດສາຫະກໍາປຸງແຕ່ງ ແລະ ການຄ້າ, ສະຫະກອນການຄ້າ, ສະພາການຄ້າຕ່າງປະເທດ ປະຈໍາ ສປປ ລາວ, ວຽກງານຄຸ້ມຄອງການຄ້າທາງດິຈີຕ໋ອນ ແລະ ການຄ້າທາງເອເລັກໂຕຣນິກ, ວຽກງານຄຸ້ມຄອງລາຄາ ແລະ ວຽກງານຄຸ້ມຄອງທຸລະກິດນໍ້າມັນເຊື້ອໄຟ ແລະ ອາຍແກ໊ສ ໃນຂອບເຂດທົ່ວປະເທດ ຊຶ່ງສາມາດຈັດເປັນກຸ່ມວຽກ ດັ່ງນີ້:

• ວຽກງານພັດທະນາຕາໜ່າງການຄ້າ ເປັນຕົ້ນ ວຽກງານຄຸ້ມຄອງຕະຫຼາດ, ວຽກງານຄຸ້ມຄອງ ສູນການຄ້າ ແລະ ຮ້ານສັບພະສິນຄ້າ, ທຸລະກິດການຈໍາໜ່າຍສິນຄ້າ (ລວມທັງການຄ້າຂາຍຍົກ-ການຄ້າຂາຍຍ່ອຍ), ທຸລະກິດຍານພາຫະນະ, ທຸລະກິດການຈໍາໜ່າຍວັດຖຸມີຄ່າ, ທຸລະກິດຂາຍກົງ, ສະພາການຄ້າຕ່າງປະເທດ ປະຈໍາ ສປປ ລາວ ແລະ ວຽກງານຄຸ້ມຄອງສະມາຄົມເສດຖະກິດ.
• ວຽກງານຄຸ້ມຄອງການຄ້າທາງດິຈີຕ໋ອນ ກໍຄື ວຽກງານການຄ້າທັນສະໄໝ ເປັນຕົ້ນ ການຄ້າທາງດິຈີຕ໋ອນ, ການຄ້າທາງເອເລັກໂຕຣນິກ ລວມທັງ ການຢັ້ງຢືນການແຈ້ງການຄ້າທາງເອເລັກໂຕຣນິກ ຜ່ານຫຼາຍຊ່ອງທາງ, ການຢັ້ງຢືນຮັບຮູ້ ແລະ ອະນຸຍາດດໍາເນີນທຸລະກິດການຄ້າທາງເອເລັກໂຕຣນິກ ແລະ ກ່ຽວຂ້ອງການການຄ້າທາງດິຈີຕ໋ອນ.
• ວຽກງານຄຸ້ມຄອງສິນຄ້າ ແລະ ລາຄາ ເປັນຕົ້ນ ບັນຊີລາຍການສິນຄ້າຄວບຄຸມລາຄາ, ລາຍການສິນຄ້າຕິດຕາມການເໜັງຕີງ, ໂຄງປະກອບລາຄາສິນຄ້າ ແລະ ຄ່າບໍລິການທີ່ລັດຄວບຄຸມ ຫຼື ມີຜົນກະທົບໄວ, ລະບົບເຄື່ອຂ່າຍຕິດຕາມລາຄາສິນຄ້າ ແລະ ຄ່າບໍລິການ, ລະບົບຕິດຕາມສະພາບການສະໜອງ ແລະ ຄວາມຕ້ອງການ ລວມທັງການຄຸ້ມຄອງລາຄາສິນຄ້າ ແລະ ຄ່າບໍລິການ.
• ວຽກງານຄຸ້ມຄອງນໍ້າມັນເຊື້ອໄຟ ແລະ ອາຍແກ໊ສ ເປັນຕົ້ນ ວຽກງານຄຸ້ມຄອງກອງທຶນນໍ້າມັນເຊື້ອໄຟ, ປັບລາຄາ, ໂຄງປະກອບລາຄານໍ້າມັນເຊື້ອໄຟ ແລະ ອາຍແກ໊ສ, ການອອກອະນຸຍາດດໍາເນີນທຸລະກິດນໍ້າມັນເຊື້ອໄຟ ແລະ ອາຍແກ໊ສ.