ກອງປະຊຸມວິຊາການ ແລກປ່ຽນ ວຽກງານການຂາຍກົງ
ກອງປະຊຸມວິຊາການແລກປ່ຽນວຽກງານການຂາຍກົງ ລະຫວ່າງກົມການຄ້າພາຍໃນ, ຄະນະປັບປຸງຮ່າງຂໍ້ຕົກລົງທຸລະກິດຂາຍກົງ ໄດ້ຈັດຂຶ້ນໃນຕອນເຊົ້າຂອງວັນທີ 14 ມັງກອນ 2025 ເພື່ອສ້າງຄວາມເຂົ້າໃຈ ແລະ ແລກປ່ຽນແນວຄວາມຄິດ ກ່ຽວກັບ ວຽກງານການຄຸ້ມຄອງດໍາເນີນທຸລະກິດຂາຍກົງ. ທຸລະກິດຂາຍກົງ ແມ່ນການເຄື່ອນໄຫວທຸລະກິດປະເພດໜຶ່ງ ທີ່ຫຼາຍປະເທດກໍຮັບຮູ້ ແລະ ມີນິຕິກຳຄຸ້ມຄອງ ຊຶ່ງ ເປັນທຸລະກິດການຈຳໜ່າຍສິນຄ້າປະເພດໜຶ່ງຜ່ານຕົວແທນເຖິງຜູ້ຊົມໃຊ້ໂດຍກົງ ຊຶ່ງ ຫຼາຍວິສາຫະກິດກໍມີຫຼາຍຮູບແບບຂອງການຕະຫຼາດທີ່ແຕກຕ່າງກັນ ຊຶ່ງບາງຄັ້ງ ຫຼາຍຄົນອາດຈະສັບສົນກັບທຸລະກິດແຊຕ່ອງໂສ້ (Ponzi) ຊຶ່ງເນັ້ນການລະດົມເງິນເພື່ອລົງທຶນ ແລະ ໃຫ້ຜົນຕອບແທນສູງເກີນຄວາມເປັນຈິງ. ດ້ານໜຶ່ງ, ຢູ່ ສປປ ລາວ ທຸລະກິດດັ່ງກ່າວ ກໍໄດ້ມີໜໍ່ແໜງເຄື່ອນໄຫວມາໃນໄລຍະໜຶ່ງແລ້ວ, ສະນັ້ນ ເຫັນວ່າ ຈຳເປັນຕ້ອງໄດ້ມີນິຕິກຳຮອງຮັບ ເພື່ອຄຸ້ມຄອງ, ຕິດຕາມ ໂດຍສະເພາະ ເພື່ອປົກປ້ອງຜູ້ຊົມໃຊ້ ກໍຄື ຕົວແທນສະມາຊິກຂອງທຸລະກິດຂາຍກົງ. ສິ່ງສຳຄັນ ການຄຸ້ມຄອງທຸລະກິດດັ່ງກ່າວ ຈະເຮັດໃຫ້ທຸລະກິດຫັນເຂົ້າສູ່ລະບົບ ແລະ ຈ່າຍພັນທະອາກອນຕາມລະບຽບການ. ສະນັ້ນ, ເພື່ອເຮັດໃຫ້ວຽກງານດັ່ງກ່າວຖືກຈັດຕັ້ງປະຕິບັດໃຫ້ເປັນຮູບປະທໍາ, ສາມາດຄຸ້ມຄອງ ແລະ ຫັນເຂົ້າສູ່ລະບົບໄດ້, ການສ້າງລະບຽບການເພື່ອເປັນບ່ອນອີງໃຫ້ພາກລັດ ກໍຄືບັນດາຫົວໜ່ວຍທຸລະກິດໃນການຄຸ້ມຄອງ ກວດກາ ແລະ ຈັດຕັ້ງປະຕິບັດຕາມ ເປັນບັນຫາສໍາຄັນ ແລະ ຮີບດ່ວນ. ໃນກອງປະຊຸມ ໄດ້ແລກປ່ຽນຄຳຄິດເຫັນຢ່າງກົງໄປກົງມາ ເພື່ອນຳໄປສ້າງນິຕິກຳຄຸ້ມຄອງ ໂດຍສະເພາະ ວິທີການຄຸ້ມຄອງຂອງປະເທດໄທ, ການຂໍອະນຸຍາດຈາກພາກສ່ວນຕ່າງໆທີ່ກ່ຽວຂ້ອງ, ແລະ ບັນຫາສຳຄັນໃນການຄຸ້ມຄອງທຸລະກິດຂາຍກົງ ທີ່ເປັນຕົວແທນຂອງຕ່າງປະເທດ ໂດຍສະເພາະ ການຮັບປະກັນການສະໜອງ ພ້ອມທັງ ການກຳນົດເສັ້ນແບ່ງລະຫວ່າງທຸລະກິດຂາຍກົງ ກັບ ທຸລະກິດແຊຕ່ອງໂສ້.
