ພິທີມອບ-ຮັບ ລະບົບການລົງທະບຽນການຄ້າທາງເອເລັກໂຕຣນິກ ອອນລາຍ(E-Trust Register Online)
ໃນວັນທີ 09 ຕຸລາ 2024 ນີ້, ທີ່ກະຊວງອຸດສາຫະກຳ ແລະ ການຄ້າ ໄດ້ມີພິທີມອບ-ຮັບ ລະບົບການລົງທະບຽນການຄ້າທາງເອເລັກໂຕຣນິກ ອອນລາຍ(E-Trust Register Online) ລະຫວ່າງ ທ່ານ ສັນຕິສຸກ ພູນສະຫວັດ ຫົວໜ້າກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ ກັບ ທ່ານ ຈັນທະວົງ ພະມີສິດ ປະທານບໍລິສັດອີທຣາດ ຈໍາກັດຜູ້ດຽວ ໃຫ້ກຽດເຂົ້າຮ່ວມເປັນສັກຂີພະຍານໂດຍ ທ່ານ ບຸນເຖິງ ດວງສະຫວັນ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແລະ ທ່ານ ພູວົງ ພະມີສິດ ປະທານບໍລິສັດ ພູວົງກຼຸບ, ປະທານສະມາຄົມຄໍາ ເຄື່ອງປະດັບ ແລະ ອັນຍະມະນີລາວ ມີບັນດາທ່ານຫົວໜ້າກົມ, ຮອງຫົວໜ້າກົມ, ຄະນະພະແນກ ພາຍໃນກະຊວງ ແລະ ພາກສ່ວນບໍລິສັດທີ່ກ້ຽວຂ້ອງເຂົ້າຮ່ວມ 40 ກວ່າທ່ານ.
ຈຸດປະສົງຂອງພິທີມອບ-ຮັບ ໃນຄັ້ງນີ້ ເປັນການຈັດຕັ້ງຜັນຂະຫຍາຍດໍາລັດວ່າດ້ວຍການຄ້າທາງເອເລັກໂຕຣນິກ ເພື່ອແນ່ໃສ່ໃນການຊຸກຍູ້, ສົ່ງເສີມ ແລະ ການຄຸ້ມຄອງການຄ້າທາງເອເລັກໂຕຣນິກ, ການຫັນການຄ້າທົ່ວໄປເປັນການຄ້າຜ່ານແພັດຟອມອອນລາຍ ໃຫ້ບັນດາຫົວໜ່ວຍທຸລະກິດການຄ້າທາງເອເລັກໂຕຣນິກ ເຂົ້າສູ່ລະບຽບການ ໂດຍການອຳນວຍຄວາມສະດວກ ບັນດາບຸກຄົນ ແລະ ນິຕິບຸກຄົນມາລົງທະບຽນການຄ້າທາງເອເລັກໂຕຣນິກດັ່ງກ່າວ ຜ່ານລະບົບອອນລາຍ. ນອກນັ້ນຍັງເຮັດໃຫ້ການດຳເນີນທຸລະກິດມີຄວາມໜ້າເຊື່ອຖື, ມີຕົວຕົນ ນໍາໃຊ້ຊ່ອງທາງການຄ້າຫຼາຍຂື້ນ ແລະ ຊ່ວຍປົກປ້ອງຜູ້ຊົມໃຊ້, ລະບົບດັ່ງກ່າວຍັງສາມາດເຊື່ອມຕໍ່ກັບຖານຂໍ້ມູນຂອງຂະແໜງການກ່ຽວຂ້ອງ ໃນການເກັບພັນທະອາກອນເຂົ້າງົບປະມານ.
ຊ່ອງທາງສໍາລັບການລົງທະບຽນການຄ້າທາງເອເລັກໂຕຣນິກ ອອນລາຍ (E-Trust Register Online) ຜ່ານເວບໄຊ https://etrust-laos.com/app/login. ສໍາລັບແອບພຣີເຄຊັນ ຈະສາມາດນໍາໃຊ້ໃນໄວໆນີ້.
